拍攝資料： N/A 自動模式
拍攝地點：堅尼地城
拍攝者：Dennis Stone (愛『攝足香港』的小伙子)
唔知大家點睇的士老尼個行業(利申：小編對好多的士老都有唔太正面既印象)
話說小編最近得閒無聊就去渣左一晚的士，
深深感受到一個『現實係殘酷 真相係坦白』既道理。
仲記得小編係紅磡站接到一個好醒既中國籍遊客，
話要去某個地方，
上車前佢已經問左警察點去尼個地方。
小編本身就無諗過見佢係遊客就老點佢，
可能的士老始終都係的士老，
可能阿Sir始終都係阿Sir。
從權力大細去睇，
小編作為細既，
難免好似比人審犯咁指指點點架啦，
阿Sir帶佢上車時就話：『佢要去尼度 響尼個位 XXX街附近』，
語氣串串貢再手指指咁補多句：『你識唔識去』(心入面可能諗你識唔X識去)
其實小編偶爾都因工作需要而渣過下私家車，
遇到警察設置既隨機抽樣路障果陣，
可能因為渣私家車就當你係車主。
當車主就等於有車階級尼個標籤下，
響法例上既對待當然一視同仁，
但語氣上既對待就相對禮貌好多(當然我知道警察入面咁多人 總有好與壞既)。
其實大家都係人，
大家都係搵餐晏仔姐，
只係個職業同身份唔同左。
標籤係社會或者有人有思想既地方係必然存在，
但我地細細個所學既『職業無分貴賤』，
而大人又係咁教時，
當社會既現實容貌又唔係咁果陣，
到底『職業無分貴賤』尼個大道理係咪真係要繼續信奉落去？
而我地日後有我地既子女果陣，
我地又係咪真係可以以身作則去灌輸『職業無分貴賤』尼個大道理比我地既下一代？
No comments:
Post a Comment