網絡世代下的社會服務品牌

社會服務機構好少講品牌形象(Branding)，總覺得默默耕耘才是王道，卻唔明白要成功建立品牌先有人俾你去耕...。Branding講D乜？呢方面我唔係專家，但簡單D講，就係持分者對一個機構既整體印象。社福機構有一個不可或缺既元素，就係同社會既互動，相反「脫節」同「離地」就正正係一個機構既致命傷。記住，我講既「脫節」同「離地」係指向「持分者對一個機構既整體印象」，而唔係實質既服務內容。而係呢個網絡世代，適當地使用網絡平台，一方面可避免脫節，另一方面對機構品牌亦有十分重要既影響。

最基本既網絡平台，就係一個機構既網站，係呢度以三個大機構(香港明愛、保良局、東華三院)作比較。設計我唔敢評論（不過就算對設計完全無sense既人都知邊個好），但以網絡平台運用黎講東華三院贏幾條街，網站可以直接連結各個主流社交媒體同埋下載手機應運程式，仲俾埋你睇facebook有萬九幾個Like。而且網站仲係響應式設計(Responsive Web Design)，即係你可以用唔同既裝置同手機都睇得好舒服。而保良局亦算正路，有Youtube同facebook專頁，網上捐款亦十分顯眼。至於香港明愛社會工作服務部，贏字數，講完。

再舉一例，上面三間機構既賣旗日既宣傳品。香港明愛同保良局都仲用傳統既單向傳訊既時候(明愛果張仲要係90年代既經典設計...)，東華三院已經玩到facebook同instagram既互動。呢D野真係唔係單單做黎叫人捐多D錢，而係整體品牌既建立。

如果屎味既咖哩同咖哩味既屎當中，必定要二選一既話，我估我都會含淚硬食屎味咖哩，因為始終都係咖哩。但係，既然你賣緊真．咖哩，又何必用一個屎既賣相呢...。