圍爐讀面書

網絡世界有一樣野普遍，就係「贏家通吃」，你做得好又或者早上岸，果個市場都會完全屬於你，就好似我地無時無刻都用緊既面書，又或者講咗一百萬次唔夠安全既Whatsapp咁，出現過咁多挑戰者都係冇人撼動到佢既地位。

如果要講面書有咩邪惡既地方，咁一定佢最厲害既「演算法」。係討論區既年代，一切都係順著時間出現，唔理你既喜好，你唔鍾意可以唔上個討論區，反止出面有大把你揀之餘，自己一個再做宣傳其實都唔難。而依家，你可能都可以整到一個類似面書既野出黎，但係要重新招到咁多人係上面作出貢獻成為你newsfeed 上既精神食糧就冇乜可能。無論想定有幾想都好，面書係社交網絡上已經有一種襲斷既地位，而佢又深深咁影響緊我地對依個世界既認知——所有野都係為你度身訂造，你平時都唔鍾意依位朋友講野，叫佢講少Ｄ係不可能，但可以唔再將佢既消息放係你個牆上面，一點一滴咁依個朋友就可以完全係你生命上仿似退場；而當然同你意見相近既朋友你就日日都見，佢做咩都知啦。

有冇試過成個牆都係某Ｄ Profile Picture？又有冇試過發覺自己距離一啲熱門話題好遠？筆者我為咗平衡下心理見識世事會專登like 「對家」既野，有時見到意見領袖係到鬧新聞出咗幾日邊個邊個／＿膠去咗邊，但睇返自己朋友又真係冇乜人有轉過相關新聞，究竟係大家都避開唔睇唔理扮冇事定係真係見唔到？可惜依Ｄ真係百口莫辯，水洗都唔清。

如果想係面書國持平啲，又有冇方法？手作Ｄ，揀返一堆均衡少少既Pages/人，有消息時通知你，又甚至乎E-mail畀你，咁就唔怕有甩漏啦，之但係一日就得24小時，你係未消化到咁多野就真係你諗你啦。